នាព្រឹកថ្ងៃទី១៨ ខែកម្ភៈ ឆ្នាំ២០២៥ នេះ ឯកឧត្តម ប៉េង ពោធិ៍សា អភិបាលខេត្តស្វាយរៀង និងឯកឧត្តម បេងហុង សុជាតិខេមរ៉ូ អគ្គនាយក អគ្គនាយកដ្ឋានរៀបចំដែនដី និងនគរូបនីយកម្ម នៃក្រសួងរៀបចំដែនដី នគរូបនីយកម្ម និងសំណង់ និងជាអគ្គ-លេខាធិការ នៃអគ្គលេខាធិការដ្ឋាន គ.ដ.ន.ជ បានដឹកនាំកិច្ចប្រជុំពិគ្រោះយោបល់ ដេីម្បីបញ្ចប់លេីការរៀបចំ”សេចក្តីព្រាងប្លង់គោលប្រេីប្រាស់ដី និងផែនការប្រេីប្រាស់ដីក្រុងបាវិត”។
កិច្ចប្រជុំនេះមានការចូលរួមពីលោកនាយករងរដ្ឋបាលសាលាខេត្ត លោក Richard Mabbitt ប្រធានក្រុមទីប្រឹក្សាបច្ចេកទេស នៃធនាគារអភិវឌ្ឍន៍អាស៊ី លោកប្រធានមន្ទីរពាក់ព័ន្ធក្នុងខេត្ត លោក លោកអភិបាលរងក្រុងបាវិត លោក លោកស្រីនាយកទីចាត់ការ និងប្រធានការិយាល័យពាក់ព័ន្ធចំណុះសាលាខេត្ត លោកប្រធានការិយាល័យភូមិបាលក្រុងបាវិត និងចៅសង្កាត់ទាំង៥ក្រុងបាវិត។
ឯកឧត្តមអភិបាលខេត្តបានថ្លែងការកោតសរសើរ និងអរគុណចំពោះមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត ដែលបានសហការ និងសម្របសម្រួលក្នុងការរៀបចំកិច្ចប្រជុំដ៏មានសារៈសំខាន់នេះឡើង ក្នុងការប្រជុំពិគ្រោះយោបល់ ដេីម្បីបញ្ចប់លេីការរៀបចំ និងសម្រេចចុងក្រោយក្នុងក្របខ័ណ្ឌបច្ចេកទេស មុននឹងដាក់ជូនក្រុមប្រឹក្សាខេត្តពិនិត្យ និងអនុម័ត រួចបញ្ជូនទៅគណៈកម្មាធិការរៀបចំដែនដី និងនគរូបនីយកម្មថ្នាក់ជាតិដើម្បីស្នើសុំរាជរដ្ឋាភិបាលសម្រេចដាក់ឲ្យប្រើប្រាស់ជាផ្លូវការដោយអនុក្រឹត្យ តាមនីតិវិធីកំណត់។
ឯកឧត្តមបានបន្តថា ក្នុងនាមជាប្រធានគណៈកម្មាធិការរៀបចំដែនដី និងនគរូបនីយកម្មខេត្តស្វាយរៀង សូមថ្លែងនូវការអរគុណយ៉ាងជ្រាលជ្រៅ ចំពោះក្រសួងរៀបចំដែនដី នគរូបនីយកម្ម និងសំណង់ ក៏ដូចជាធនាគារអភិវឌ្ឍន៍អាស៊ី ដែលកន្លងមកនេះ បានដឹកនាំ សម្របសម្រួល និងគាំទ្រ ជាពិសេសលើផ្នែកបច្ចេកទេស តាមរយៈការចុះពិនិត្យផ្ទាល់ ក៏ដូចជាការរៀបចំសិក្ខាសាលាពិគ្រោះយោបល់ជាបន្តបន្ទាប់ដោយមានការចូលរួមពីគ្រប់ភាគីពាក់ព័ន្ធ រហូតនាំឲ្យយើងសម្រេចបាននូវឯកសារសេចក្ដីព្រាង ដែលមានភាពលម្អិត និងគ្រប់ជ្រុងជ្រោយក្នុងការប្រជុំពិគ្រោះយោបល់ ដេីម្បីបញ្ចប់លេីការរៀបចំ”សេចក្តីព្រាងប្លង់គោលប្រេីប្រាស់ដី និងផែនការប្រេីប្រាស់ដីក្រុងបាវិត” នៅថ្ងៃនេះ។
ឯកឧត្ដមបានបន្ថែមថា ជាការពិតណាស់ ផែនការរៀបចំដែនដី គឺជាឯកសារយុទ្ធសាស្ត្រគោលនយោបាយសំខាន់មួយ ដែលផ្តល់នូវចក្ខុវិស័យ និងគោលដៅអភិវឌ្ឍរយៈពេលវែង ក៏ដូចជាផ្តល់ទិសដៅជាក់លាក់សម្រាប់ការអភិវឌ្ឍដែនដីក្រុងបាវិតដើម្បីធានាឲ្យបាននូវការអភិវឌ្ឍប្រកបដោយនិរន្តរភាព ។
ឯកឧត្ដមបន្ថែមថា បើគិតមកដល់ពេលនេះ ក្នុងខេត្តស្វាយរៀងទាំងមូល យើងមានតំបន់សេដ្ឋកិច្ចពិសេសកំពុងដំណើរការចំនួន ៩កន្លែង និងកំពុងរៀបចំ ៣កន្លែងថែមទៀត មានរោងចក្រ សហគ្រាស សរុបទាំងក្នុង និងក្រៅតំបន់សេដ្ឋកិច្ចពិសេស ៣០៧កន្លែង ហើយបើយើងមើលពីសក្ដានុពល និងគម្រោងថ្មីៗរបស់រាជរដ្ឋាភិបាលគឺគម្រោងផ្លូវល្បឿនលឿនភ្នំពេញបាវិត និងគម្រោងផ្លូវដែក ជាដើម។ ដូច្នេះ ផែនការរៀបចំដែនដីក្រុងបាវិតគឺពិតជាមានសារៈសំខាន់ណាស់ ដែលមិនត្រឹមតែឆ្លើយតបទៅនឹងតម្រូវការរបស់ប្រជាពលរដ្ឋ និងការអភិវឌ្ឍនៅក្នុងយុគសម័យនៃភាវូបនីយកម្មថ្នាក់តំបន់ និងសកលភាវូបនីយកម្មប៉ុណ្ណោះទេ ប៉ុន្តែវាផ្តល់ឲ្យនូវទិសដៅជាយុទ្ធសាស្ត្រ ដើម្បីកំណត់ទម្រង់នៃការអភិវឌ្ឍដោយធានាបាននូវការផ្ដល់សេវាធារណៈដែលមានលក្ខណៈឆ្លើយតប ការអភិវឌ្ឍវិស័យកសិកម្មប្រកបដោយចីរភាព ក៏ដូចជារក្សាបាននូវតុល្យភាពរវាងការគ្រប់គ្រងធនធានធម្មជាតិ បរិស្ថាន និងការអភិវឌ្ឍសេដ្ឋកិច្ច-សង្គមប្រកបដោយនិរន្តរភាព។
នៅក្នុងឱកាសនោះដែរ លោក Richard Mabbitt ប្រធានក្រុមទីប្រឹក្សាបច្ចេកទេស នៃធនាគារអភិវឌ្ឍន៍អាស៊ី បានធ្វើបទបង្ហាញពីខ្លឹមសារសេចក្ដីព្រាងផែនការរៀបចំដែនដីក្រុងបាវិតដែលក្រុមការងារបានរៀបចំកន្លងមកផងដែរ៕
